02/09/2026
അനിലക്ക് മാനസിക വിഭ്രാന്തി ഉണ്ടായിരുന്നു…
അമേരിക്കയിലെ കാലിഫോർണിയയിൽ മലയാളി സമൂഹത്തെ ഒന്നാകെ ഞെട്ടിച്ചുകൊണ്ട് രണ്ട് ഉറ്റസുഹൃത്തുക്കളായ യുവതികൾ കൊല്ലപ്പെട്ട സംഭവത്തിൽ കൂടുതൽ വിവരങ്ങൾ പുറത്തുവന്നു. അമേരിക്കയിൽ ഉന്നത ജോലിയും നല്ല ജീവിതനിലവാരവും പുലർത്തുന്ന മലയാളി കമ്മ്യൂണിറ്റിക്ക് വലിയ ആഘാതമായി മാറിയ ഈ സംഭവത്തിൽ, പാലാ മൂന്നിലവ് സ്വദേശിയായ അനില എന്ന യുവതിയാണ് തന്റെ അടുത്ത സുഹൃത്തുക്കളായ ആൻമേരി മാത്യു, അഞ്ചന എന്നിവരെ ആസൂത്രിതമായി വധിച്ചത്. സാൻ ഹോസെയിലെ ആൻമേരിയുടെ വസതിയിലെത്തി രണ്ട് ആയുധങ്ങൾ ഉപയോഗിച്ച് അതിക്രൂരമായി കൊലപ്പെടുത്തിയ ശേഷം, വാഹനം ഓടിച്ച് മിൽപീറ്റസിലെത്തി തന്റെ അപ്പാർട്ട്മെന്റ് സമുച്ചയത്തിൽ താമസിച്ചിരുന്ന അഞ്ചനയെ ഫോൺ വിളിച്ച് താഴെയിറക്കി വാഹനം ഇടിച്ചു കൊലപ്പെടുത്തുകയായിരുന്നു. കൃത്യത്തിനു ശേഷം ഒളിവിലായിരുന്ന അനിലയെ പോലീസ് പാർക്കിംഗ് ഏരിയയിൽ വെച്ച് കസ്റ്റഡിയിലെടുത്തു.
ഇവർ മൂവരും തിക്ക് ഫ്രണ്ട്സും ഒന്നിച്ച് യാത്രകളും ഓണാഘോഷങ്ങളും സംഘടിപ്പിച്ചിരുന്ന അടുത്ത സുഹൃത്തുക്കളുമായിരുന്നു. കൊലപാതകത്തിന് കൃത്യമായ മറ്റ് ബാഹ്യകാരണങ്ങളോ വൈരാഗ്യമോ കണ്ടെത്താൻ കഴിയാതിരുന്ന പോലീസ്, പ്രതിയായ അനിലയുടെ മാനസികാരോഗ്യ നിലയെക്കുറിച്ചുള്ള വിവരങ്ങൾ കേന്ദ്രീകരിച്ചാണ് നിലവിൽ അന്വേഷണം മുന്നോട്ടുകൊണ്ടുപോകുന്നത്. അനില കടുത്ത മാനസിക സമ്മർദ്ദവും അസ്വസ്ഥതകളും അനുഭവിച്ചിരുന്നതായി ഇവരുമായി അടുത്ത ബന്ധമുള്ളവർ വ്യക്തമാക്കുന്നുണ്ട്. അകാരണമായ ഭയവും മറ്റുള്ളവരെ അപായപ്പെടുത്താനുള്ള വെളിപാടുകൾ ഉണ്ടാകുന്നുവെന്ന ചിന്തകളും അനില പ്രകടിപ്പിച്ചിരുന്നതായി മെഡിക്കൽ മേഖലയിലുള്ള സുഹൃത്തുക്കൾ സൂചിപ്പിച്ചിരുന്നു. ആ സമയത്ത് തന്നെ മനഃശാസ്ത്രജ്ഞന്റെ സഹായം തേടാൻ നിർദ്ദേശിച്ചിരുന്നെങ്കിലും, ഇത്തരം അസ്വസ്ഥതകൾ തിരിച്ചറിയപ്പെടാതെ പോയതാണ് വലിയ ദുരന്തത്തിലേക്ക് വഴിതെളിച്ചത്.
പാശ്ചാത്യ രാജ്യങ്ങളിലേക്ക് കുടിയേറുന്നവർ നേരിടുന്ന കടുത്ത മാനസിക സമ്മർദ്ദങ്ങളും ബന്ധുബലമില്ലായ്മയും ഇത്തരം മാനസിക വിഭ്രാന്തികളിലേക്ക് നയിക്കാറുണ്ടെന്ന് വിദഗ്ദ്ധർ ചൂണ്ടിക്കാണിക്കുന്നു. ഒസിഡി, സ്കിസോഫ്രീനിയ, പ്രസവാനന്തര മാനസിക പ്രശ്നങ്ങൾ തുടങ്ങിയ രോഗാവസ്ഥകൾ യഥാസമയം തിരിച്ചറിയപ്പെടാതെ പോകുന്നത് വലിയ അപകടങ്ങൾക്ക് കാരണമാകുന്നുണ്ട്. പ്രതിയായ അനില നിലവിൽ ജയിലിലല്ല, മറിച്ച് പോലീസിന്റെ കസ്റ്റഡിയിൽ പ്രത്യേക മാനസികാരോഗ്യ കേന്ദ്രത്തിൽ ചികിത്സയിലാണ്. ഇവരുടെ അവസ്ഥ കണക്കിലെടുത്ത് പോലീസ് അതീവ ജാഗ്രതയോടെയും സഹാനുഭൂതിയോടെയുമാണ് കാര്യങ്ങളെ സമീപിക്കുന്നത്..
കൊല്ലപ്പെട്ട രണ്ടുപേരുടെയും കുടുംബങ്ങൾക്ക് ആശ്വാസമേകാൻ പ്രാർത്ഥിക്കുന്നതിനൊപ്പം, മാനസികാരോഗ്യത്തെക്കുറിച്ചുള്ള പൊതുജനങ്ങളുടെ അജ്ഞത മാറ്റേണ്ടതിന്റെ ആവശ്യകതയും ഓർമ്മിപ്പിക്കുന്നു…
