05/06/2017
السلام عليكم , كل عام وانتم بخير وتقبل الله منا ومنكم صالح الأعمال ..
- معلومات عامة لكل واحد بيفكر يبدأ في مجال الإستيراد ( سواء من الصين أو من أي بلد تانية ) .
-
1 – حضرتك لازم تكون فاهم كويس جدا في المجال اللي ناوي تشتغل فيه ولو شغال في مجال معين لازم تعرف ان خبرتك في المجال ده محدودة نسبيا بالنسبة لتطور المجال ده في البلاد المصنعة , وده يخليك وانت بتطلب منتج معين تكون على الأقل مدرك طلبك ومواصفاته اللي انت محتاجها , في منتجات كل ما كانت أحدث وأفضل بتكون أفضل في الاستخدام , وفي منتجات متماشية مع السوق الخاص بيك , لو طلعت للأحدث فيها هيحصل عندك مشكلة في التسويق , طبعا أنا قولت جملة خبرتك في المجال ( مفصلتش جزئية النقاط الفنية في المنتج ) أياً كان نوعه إيه , لأنك ما دام هتشتغل في منتج أو شغال فيه لازم يكون عندك الحد الأدنى في الأجزاء الفنية اللي تخليك قادر على الأقل انك تعرف تطلب وتميز بين درجات الجودة وتعرف ايه اللي يناسب سوقك من حيث ( الجودة والسعر ) .
2 – حجم الشغل اللي حضرتك بتطلبه من اي دولة بينقسم لنوعين ( طلبية صغيرة – طلبية كبيرة ) , أوقات كتير جدا بيكون خيار التعامل مع الشركات التجارية الموردة افضل من المصانع في الطلبيات الصغيرة , لأن الشركات التجارية بتكون زي تاجر الجملة بالضبط , عنده بضاعة أو منسق مع المنتج وبيقدر يديلك كميات صغيرة او كبيرة حسب طلبك , لكن لو انت حجم استيرادك واحتياجك لمنتج بيكون حاوية أو أكثر , في الحالة دي يفضل انك تتعامل مع المصنع مباشرة , وهنا لازم يكون تعاملك مع شخص أمين إن كان مكتب أو وسيط لأن في شغل كتير بيحصل في الجزئية دي مش كويس على الإطلاق .
3 – بعد ما توصل للمنتج الخاص بيك وتتفق على سعره سواء من شركة أو مصنع , لازم وانت بتتفق تاخد بالك ان السعر ده شامل الشحن لبلدك , CIF أو C&F وتقريبا الاتنين زي بعض والفرق هو التأمين فقط , ( التأمين على الشغل ) بحيث لقدر الله حصل حاجة تبقى مأمن على البضاعة , أو التسليم في البلد المصدرة بدون شحن وهو FOB , وده بيسلمك في المينا وانت تشحن بمعرفتك , أو EXW وده بقى بيسلمك من المصنع وانت تتولى شحن البضاعة من المصنع للمينا ومن المينا لبلدك .
بقية الموضوع اول تعليق4 – لازم تفهم كويس الورق اللي البلد محتاجاه في كل منتج , ودي وظيفة ( المستخلص الجمركي ) اللي هتقوله أنا هجيب منتج ( 1 ) ايه الورق والشهادات المطلوبة وشكل الفاتورة وتوثيقها .... الخ .
,. المستخلص نقطة هامة جدا , ناس كتير بتلبس في شغل غلط بسبب انها بتعتمد على نفسها فقط وبتتجاهل علم المستخلص وبيجبوا الشغل بدون مراعاة الجوانب الفنية المطلوبة كأوراق وطريقة التعبئة والبيانات ... الخ . دي نقطة مهمة جدا قبل الشحن ناخد بالنا منها كويس جدا .
5 – بعد الشحن , نظام الشحن في اي بلد عموما بيكون ان الشركة المصدرة اللي حضرتك هتتعامل معاها سواء كان مصنع او شركة تجارية او حتى شركة شحن , كل اللي بتعمله انها بتحجز لحضرتك الحاوية وتحملها وتخلصلك الورق المطلوب وتغادر البلد المصدرة , بعد كده طرف المصدر وشركة الشحن انتهى ! بمعنى اي مشكلة او متابعة لمشكلة معينة بنسبة 99% بيكون مع وكيل الشحن في بلدك , وده يخليك تختار شركة شحن في البلد الي هتستورد منها وكيلها في بلدك شركة محترمة , عشان تتلاشى اي مشاكل في النقطة دي وبتخسر ناس كتير , ( أحب أشير إن لو شغلك هيكون فيه عرض معمل وتحليلات ) لازم تشترط على الشركة او مكتب الشحن يحجزلك فترة سماح 21 يوم , ودي أقصى فترة شحن ممكن تاخدها من اي شركة شحن , ممكن تمدها لاحقا وتدفع فلوس , لأن انت عندك فترة سماح خاصة بتكلفة الحاوية - الحاوية بتقعد مع حضرتك اسبوع او اسبوعين او ثلاث اسابيع , لو حجزت اسبوع في اليوم الثامن تبدأ الغرامات تتحسب عليك بالدولار وبتترفع شرايح كل يومين تلاتة الغرامة بتدخل في شريحة اعلى , ( طبعا ده غير أرضيات الجمرك والحراسات والمطافي ) .. وده احيانا بيكلف ناس لعدم المعرفة حق البضاعة وزيادة غرامات .. اتمنى النقطة دي تكون واضحة .
6 – النقطة الأخيرة كل حاجة تقريبا سعرها ثابت في البلد المصدرة , نقطة التعويم خليتك تحس بفرق الضعف على الاقل في المنتج اللي كنت بتتشريه قبل التعويم بنفس سعر عملة البلد المصدرة , بقيت تحس انه غالي عليك الضعف , حتى لو السعر تم تخفيضه بنسبة 10% او اكثر انت لسه حاسس انه غالي جدا , ودي مشكلة بلدك مش مشكلة البلد المصدرة نظراً لفرق العملة , وانا بقول كده عشان اللي كان بيلم شغل في الحاوية ويحشيها ( حشو ) دلوقتي لازم يتأكد ان كل صنف ومنتج بيحطه في الحاوية هيجازي معاه وغالب ظنه انه ربنا هيطعمه فيه وهيرزقه فيه ،
