26/04/2026
•圓滿•
「十年」，是一個重要的階段，長期的承諾；我哋呢檔「旅孩集課」，轉眼間都九週年！係呀，雖然無更新，但我哋一直佛系營運中！
［長文慎入如無耐性可跳至最後一行］
當初只因為增加成功率喺office一齊搶特價機票、反正搶到就一齊去、去到發現大家都鍾意睇雜貨…然後講咗唔知幾耐，兩個人終於有決心搞咗呢檔嘢出嚟。
旅孩如常飛自己想去嘅國度，多咗嘅就只係去市集同去工藝店可以開懷地買，多咗嘅係行李嘅負重，呢份「多咗」係旅孩同「旅孩集課」嘅成長。
品牌自有品牌嘅命！由市集到寄賣店，癲到開到實體pop up store, 多謝「旅孩集課」，畀咗一場超乎想像嘅經歷畀旅孩。
當初成立「旅孩集課」嘅初心，只係滿足兩條女選物嘅眼光、去旅行、行市集買嘢有個借口、擺市集可以分享自己踏足過嘅國度毒下旅粉；到後來，我哋認真試下賺唔賺到兩串「燒賣錢」。總之由始至終，都無真係成為一盤只講盈利嘅生意。
而隨著時間推進，兩位旅孩嘅重心，由一個人一份工同一個page；變成三個人或兩個人加一隻貓。少咗份瀟灑、少咗啲時間、多咗好多牽絆、更重要係少咗啲體力。雖然無完全放低「旅孩集課」，不過真係力不從心。
十年係一個週期，亦係一個圓滿。借今年4月踏入九週年至2027年4月25日踏入第十年，兩位旅孩決定做個正式道別，慢性地為「旅孩集課」收攤。
即係呢，由今日起計一年，
*半*賣*半*送*特*價*清*貨
第一波係嚟緊星期五1-3/5馬灣1868市集，有折扣、有自由定價、有水吹，寄賣店同步提供折扣優惠！
最後，多謝9年來陪我們走過無數旅程的您們，
請大大力支持我哋嘅「一年執笠企画」！
#旅孩集課 #砂煲罌罉 #生活老件 #光榮結業
