25/05/2021
මේක සරළ කතාවක් ...
ඔන්න ධාන්ය වලින් පිරුණු ගැඹුරු භාජනයක් උඩින් මීයෙක් තිබ්බලු. දැන් ඉතින් කෑම හොයන් වටේ දුවන්න ඕනේ නෑනේ, වටේම කෑම. මීයට හරිම සතුටුයි ලු. දැන් ඉතින් මීයා භාජනය ඇතුලේ ඉඳන් ධාන්ය ටික ටික කනවලු. ධාන්ය අඩු වෙන්න අඩු වෙන්න මීයා භාජනයේ පතුලට ටික ටික ලං වෙනවා කියලා ඌට තේරුනේ නැහැ. ඔහොම දවස් ගානක් ගත වුණාට පස්සේ දන්නෙම නැතිව ඌ භාජනය පතුලටම ඇවිත්. දැන් කන්න දෙයකුත් නෑ. භාජනයෙන් එළියට යන්න විදිහකුත් නෑ. අන්න එතකොට තමයි මේ මීයට තේරුණේ ඌ ඉන්නේ උගුලක හිර වෙලා කියලා.
මේ කතාව කියුවේ වෘත්තිකයන් තනි ආදායමකට සහ තනි අනන්යතාවයකට කොටු වන ආකාරය සරළව පැහැදිලි කරන්න. මේ තත්වය හඳුන්වනවා SISI (Single Income, Single Identity) කියලා.
භාජනයේ පතුලේ හිර වුණාට පස්සේ ජීවිතය පවත්වා ගැනීමටනම් එම භාජනය තුළට ධාන්ය දමන පුද්ගලයෙකු මත පමණක් යැපෙන්නට ඌට සිදු වෙනවා. තවද කැමති ධාන්යයක් නොලැබෙන අතර ඔහුට තෝරා ගැනීමක්ද නොමැති වෙනවා. ජීවත් වෙන්න අවැසිනම් ඌට ලැබෙන ඕනෑම ධාන්ය වර්ගයක්, ධාන්ය ප්රමාණයක් මත යැපෙන්නට සිදු වෙනවා.
උඩ කිව්ව සරළ කතාව ඇතුලේ තියෙන්නේ බොහොම ගැඹුරු අර්ථයක් කියන එක ඔයාලට දැනටමත් අවබෝධ වෙලා ඇති.
ඔයා දැටමත් එක අදායම් මාර්ගයක් මත හෝ ඔයා ළඟ තියෙන සම්පත් ප්රමාණයක් මත සැනසීමෙන් කාලය ගත කරනවා ඇති. හැබැයි මතක තියාගන්න .. ඔබේ මේ කෙටි කාලීන සතුට, නුදුරු අනාගතයේදීම ඔබව දිගු කාලීන උගුලක පටලවන්න පුළුවන්. (Short term pleasures can lead to long-term traps)
ඔබට ජීවිතයේ අවැසි දේවල් ඉතා පහසුවෙන් ලැබෙයි නම්, ඔබ ඕනෑවටත් වඩා සුව පහසුවෙන් ජීවත් වන බව ඔබට දැනෙනවානම් ඔබ ජීවිතය පවත්වාගෙන යාමේ උගුලට හසුවෙමින් සිටිනවා වෙන්න තියෙන ඉඩ කඩ වැඩි. (If things are coming easy and you are getting comfortable, you are getting trapped into survival mode)
භාවිතයක් නැත්නම් හැකියාවන් උනත් මොට වෙනවා කියලා අද්දැකීමෙන් ඔයා දන්නවා ඇති. ඉතින් ඔයාගේ දියුණුවට ඔයා තුළ තියෙන හැකියාවන් හා ශක්තින් භාවිතයට ගත්තේ නැත්නම් කාලයත් එක්ක ඒ හැකියවන් ශක්තින් දිය වෙලා යනවා. (When you are not using your potential, you are losing it)
ඔබ නිවැරදි තීරණයන් නිවැරදි අවස්ථාවේ නොගතහොත්, ඔබට ඇති සම්පත් හා හැකියාවන් වියැකී ගොස්, ඔබට ඔබ සිටි තැනින් පිටතට පැමිණීමට කිසිම අවස්ථාවක් නැති වෙන්නට පුළුවන්.. (If you don’t take right Action at right time, you will finish what you have and will be in no position to come out.)
හිතල බලන්න ඔයත් භාජනයක් ඇතුලේ හිරවෙමින් සිටින මීයෙක් ද කියලා ... 🧐
ඉතින් ආදරෙන් කියන්න තියෙන්නේ කොයිම වෙලාවකවත් එක අදායම් මාර්ගයක් මත යැපෙන්න, එක අදායමකින් තෘප්තිමත් වෙන්න එපා. ඔයාගේ අදායම් මාර්ග විවිධාංගීකරණය කරන්න. ( අදායම් මාර්ග එකක්වත් නැත්නම් ඉස්සලම එකක් හොයාගන්න 😛 ) එහෙම කළොත් ඔයාට එක අදායම් මාර්ගයක් (උදා - රැකියාව) ගැන තියෙන ආසාව නැති වුනු දවසකට දෙපාරක් හිතන්නේ නැතිව ඊට සමු දෙන්න පුළුවන්. ගංවතුර, වසංගත හෝ ඒ වගේ වෙනත් ව්යසනයකින් ඔයාගේ ප්රධාන අදායම් මාර්ගයට හානියක් වුනත් ජීවිතේ කරදරයක් නැතිව ගත කරන්න පුළුවන්. කොහොමත් කොච්චර අදායම් මාර්ග තිබුණත් වැඩි වෙන්නේ නෑනේ 😉
දැන් පටන් ගන්න > හිතන්න> ඔයාගේ SISI zone එකට attack කරන්න...
Good Luck !
- By Piyu Nayanathara
