25/10/2021
عزيزى العميل اهلا بك
لو حابب تسأل عن الشحن الجوى من الى جميع دول العالم اتفضل تحت امرك .
انا هتكلم فى كم نقطة مهمين جداااا لبعض العملاء اللى دايما لهم استفسارات خاصة بالاسعار علشان اوفر مجهود العملاء المهتمين فعليا فى الاجابات المكررة .
** اولا حضرتك لما حضرتك بتسأل عن سعر الكيلو لازم تحط فى اعتبارك ان الكيلو مش ثابت للشحن الجوى يعنى مش معنى ان اول كيلو مثلا بـ 500 يبقا 10 كيلو 5000 جنيه غلط مش كده .
بمعنى ادق مش معنى ان حضرتك لما تسال عن سعر اول كيلو كده يبقا انت وفرت وحسبت الحسبة بطريقتك بالعكس انت ممكن تضيع عليك فرصة من السيلز اللى بيتواصل مع حضرتك لما بيسالك الوزن كم كيلو فعليا على الميزان وابعاد الشحنة مقاس كم سنتيمتر ابعاد طول فى عرض فى ارتفاع وده مهم لان الحسبة فى سعر الشحن الجوى بيكون بالوزن الفعلى او الحجمى وايمها اكبر بيتحسب الاكبر طبعا .
حضرتك بيكون اغلب العملاء معندهمش صبر يقولوا الوزن الفعلى كم والابعاد كم فى كم ودى اغلب العملاء اللى بيحصل معاهم مشاكل فيما بعد نظرا لانه استهسل السؤال وكمل على اساس الديل مع السيلز وده خطأ بيقع فيه اغلب العملاء
*** لازم حضرتك توزن شحنتك بالظبط لو انت اللى مغلفها وقافلها باحكام ولازم تقيس الابعاد بالسنتيميتر من الابعاد التلاته وتقسم الناتج على 5000 لحساب الوزن الحجمى ولو الحجمى اكبر من الفعلى على الميزان هيتاخد الحجمى ولو الميزان اكبر هيتاخد الميزان .
*** ليه بنقول اوزن شحنتك واتعب نفسك اول مرة لانك ممكن تكون حاطط فى اعتبارك ان الوزن ممكن لا يتخطى كمية معينة فى خيالك وتيجى تلاقى الحساب اكبر من توقعاتك لانك كسلت بس تحسب الوزن والابعاد وهتلاقى الشركة بعتالك اسكرين من الشحنة بعد التغليف وهى على الميزان وتبدا انت بقا الشيطان يصورلك ان الشركة بتغش فى الميزان وكلام كتير احنا فى غنا عنه لو حضرتك من الاول عرفت الوزن كم والابعاد كم .
*** كمان فى حاجة مهمة هى انك تحدد اللوكيشن أوالرمز البريدى اللى رايح له الشحنة لان فى بعض البلدان بيكون فيها قرى ومدن فى الاطراف وبيتم حساب الوقود فى الشحنة بشكل اكبر وده بيكلف اكتر فى الشحنة لو مكنتش حاسب المكان اللى رايحه فيه الشحنة وتتفاجىء بان السعر متغيير ضرورى جدا تكون عارف الرمز البريدي للمرسل اليه علشان تتفادى اى خطأ فى السعر .
*** كمان لازم تحط فى اعتبار حضرتك ان شركة الشحن ملهاش سلطة على الجمارك لانها مجرد وسيلة توصيل والسعر اساسى بيكون غير شامل الجمارك لان الجمارك مصلحة حكومية تابعة للدولة اللى رايح لها الشحنة واكيد العميل المرسل اليه فى البلد الاخر مطالب بانه يحاسب على الجمارك الخاصة بالشحنة زى عندنا هنا بالظبط وتخيل حضرتك فى مصر بتستورد شحنة من الصين مثلا وطبعا بتكون حامل هم الجمارك كذلك الشحنة الصادرة من مصر بيكون لها جمارك فى الدول المرسل اليها الشحنة بتاعك.
حضرتك لو بتشحن لعميل لك فى الخارج او بتشحن لقريب لك والشحنة عدت وزن 49 كيلو لازم تعرف انها هتدخل فى التجارى وفى الحالة دى بيكون مطلوب ورق للتخليص الا لو متفق مع الشركة فى مصر على انها توفر ورق ايجار صاحبه بياخد عمولة على اجمالى الفاتورة بعد القيمة المضافة والضرائب .
حضرتك الادوية محظورة بكل اشكالها ولازم يكون فى تصريح من وزارة الصحة قبل الشحن وتوكيل بالتصدير من الشركة صاحبة الدواء .. ولو بتشحن دواء لقريب لك من الدرجة الاولى ويكون اسمه متوافق مع اسمك فى البطاقة الشخصية وقتها تقدر تعمل تصريح من الادارة الطبية فى العتبة وبيكون معاك روشتة طبيب كاتب الجرعات والجرعة المسموح بيها مش اكتر من 3 الى 6 شهور مش متذكر بالظبط لكنه بيقسم العدد على التلات شهور او الستة اشهر دول .
البرفانات والسوائل والعملة النقدية القديمة والوثائق القديمة والكتب القديمة والاسلحة وكاميرات سرية او ما شابه ممنوعه فى الشحن الجوى ولو اتحطت فى اماكن سرية على شكل تهريب ممكن توقف الشحنة كلها اشتباه وتفتيش وبياناتك كلها على البوليصة .
الدول اللى بيكون فيها مخاطر وحروب ونزاعات بيكون عادة مفروض عليها غرامات ومخاطر حرب وده بيزود من سعر الشحنة مهما كان وزنها لازم يضاف على الشحنة رسوم مخاطر حرب فى العراق مثلا بتوصل الرسوم تقريبا 56 دولار او اكتر تحت بند رسوم مخاطر حرب طبعا غير سعر الكيلو نفسه
دول المغرب العربى وشمال افريقيا وغرب افريقيا وجنوب افريقيا دى زون بعيد وبيكون سعرها برضه عادة عالى لانها بعيدة فى ترتيب زون الشحن .
لو بتفكر تستورد شحنات وبتاجر فى الملابس مثلا يبقا النصيحة انك تتجه مباشرة الى الشحن البرى القادم من الخليج لان الخليج سبقنا وعمل مخازن ولوجستيات بتستورد من الصين مباشرة باسعار شحن مخفضة جدا من المورد زى مثلا على اكسبريس وتاوباو وغيرهم من المواقع الاونلاين اسف
على الاطالة لكن فيه استفسارات كتيرة بنقابلها يوميا حاولت انى اجاوب على اغلبها .
للتواصل والاستفسارات والشحن ممكن على واتس اب من هنا مباشرة كلمنا واتساب من هنا 👇☎️
https://bit.ly/3iKr1Ww
و لو مهتم وعندك شحنة جاهزة من فضلك إملأ البيانات من هنا واحنا هنكلمك فى اقرب وقت
https://bit.ly/3pyi9IF
