19/03/2026
لو في دايرتك القريبة "مستخلص جمركي"، سواء كان صديق ، أو قريب، أو حتى جار اللي بتقابله على السلم.. أكيد لاحظت عليه الأيام دي إنه عصبي زيادة، خلقه ضيق، ولو كلمته في التليفون ممكن ميردش عليك بالساعات، ولما يرد تلاقي صوته طالع بالعافية.
اعذروهم.. أصلكم متعرفوش "حياة المستخلص" بتبقى عاملة إزاي، خصوصاً في الأسبوع الأخير من رمضان اللي قبل إجازة العيد مباشرة.
إنت بتشوفه وهو راجع قبل الفطار مهبط، بس متعرفش إنه كان في سباق مع الزمن.
المستخلص الجمركي في رمضان بيتحط في "ضغط عصبي" ميتوصفش.
إنت متخيل يعني إيه مطلوب منه يخلص إجراءات الشحنة في ساعات عمل لا تذكر؟
• البنوك: بتفتح 4 ساعات بس.
• التوكيلات الملاحية: هما كمان 4 ساعات.
ده غير الجهات الحكومية اللي مواعيدها الرسمية من 10 الصبح لحد 2 الظهر، بس فعلياً وبحكم "الصيام" والزحمة، بتصفي على 3 ساعات شغل حقيقي. في الـ 180 دقيقة دول، المخلص لازم يكون زي "الأخطبوط"؛ عين على السيستم، ورجل في الساحة، وإيد بتمضي أوراق، ودماغ بتفكر في "زمن الإفراج".
كل كوم، والأسبوع الأخير اللي قبل العيد ده كوم تاني خالص. إحنا في المهنة دي بنرفع حالة الطوارئ للدرجة القصوى. بيبقى هدفنا الوحيد "نفرج عن أكبر قدر من الشحنات".
لأن إجازة العيد 5 أيام، والشحنة اللي هتفضل مركونة في الميناء طول الإجازة دي هتاكل قلب المستورد من المصاريف والأرضيات، وهتخسره مبالغ ضخمة.
المستخلص هو الوحيد اللي شايل هم "زمن الإفراج" بجد.
أي حد تاني ممكن ييجي في المركز التاني أو التالت، لكن المستخلص هو اللي في المدفع.. هو اللي متصدر للمستورد اللي بيغلي من القلق وعايز بضاعته تدخل مخازنه قبل وقفة العيد، وهو في نفس الوقت اللي بيتحمل برود بعض الموظفين اللي ماشيين بمبدأ "فوت علينا بكرة يا سيد".
الضغط العصبي ده لا يمكن وصفه، إحنا فعلياً بنحارب في جبهات كتير في وقت واحد عشان "نفرج" عن الحاوية.
إحنا فعلياً بقالنا أيام منمناش، عيونا زغللت من شاشات الكمبيوتر ومن الجري في الساحات تحت المطر.
لكن خلاص، وصلنا للمحطة اللي محتاجين فيها "نفصل".
من الليلة دي، هنعلن حالة "البيات الشتوي" زي الدب القطبي. ومحدش يحاول يصحينا ولا حتى يرن علينا، لحد الساعة 11:59 مساءً يوم السبت الموافق 21 مارس 2026.
ليه التوقيت ده بالذات؟ لأن "النافذة" (السيستم) هتدخل في مرحلة صيانة، ومش هنعرف ندرج أي رقم ACID في الفترة دي. يعني "قُضي الأمر"، مفيش في إيدينا حاجة نعملها غير إننا ننام ونرتاح من المطحنة اللي فاتت، عشان نشحن طاقتنا للمطحنة اللي جاية
كل سنة وأنتم طيبين، اعذرونا لو قصرنا، وادعولنا في الأيام دي ببركة الوقت والجهد. وعيد سعيد عليكم وعلى كل حبايبكم 💚
