08/10/2026
🚌 എംഎൽഎ ഫണ്ടിലൂടെ ആദ്യമായി കെ.എസ്.ആർ.ടി.സി.യ്ക്ക് പുതിയ ബസ്; മാതൃകയായി അഡ്വ.കെ. പ്രവീൺ കുമാർ എംഎൽഎ
പൊതുഗതാഗതം ശക്തിപ്പെടുത്തുന്നതിനായി എംഎൽഎ ഫണ്ട് ഉപയോഗിച്ച് കെ.എസ്.ആർ.ടി.സി.യ്ക്ക് പുതിയ ബസ് വാങ്ങുന്നതിനുള്ള നടപടികൾക്ക് തുടക്കമായി.
കേരളത്തിൽ ആദ്യമായി എംഎൽഎ ഫണ്ടിൽ നിന്ന് കെ.എസ്.ആർ.ടി.സി. ബസ് വാങ്ങുന്നതിനായി തുക അനുവദിച്ച് കൊയിലാണ്ടി എംഎൽഎ അഡ്വ. കെ. പ്രവീൺ കുമാർ മുന്നോട്ട് വന്നു.
പുതിയ ബസ് വാങ്ങുന്നതിനായി ₹40 ലക്ഷം രൂപയുടെ പ്രൊപ്പോസൽ എംഎൽഎ കോഴിക്കോട് ജില്ലാ കലക്ടർ എം.എസ്. മാധവിക്കുട്ടിക്ക് കൈമാറി. കോഴിക്കോട് ജില്ലാ കലക്ടറുടെ ചേംബറിൽ നടന്ന ചടങ്ങിലാണ് പദ്ധതിയുമായി ബന്ധപ്പെട്ട നടപടികൾക്ക് തുടക്കമായത്.
എംഎൽഎ ഫണ്ട് ഉപയോഗിച്ച് കെ.എസ്.ആർ.ടി.സി. ബസ് വാങ്ങുന്നതിനായി തുക നീക്കിവയ്ക്കുന്ന സംസ്ഥാനത്തെ ആദ്യ എംഎൽഎ എന്ന നിലയിൽ ഈ പദ്ധതി ശ്രദ്ധേയമാണ്.
കൊയിലാണ്ടി നിയോജകമണ്ഡലത്തിലെ യാത്രാക്ലേശം പരിഹരിക്കുന്നതിനും പൊതുഗതാഗത സംവിധാനത്തെ കൂടുതൽ ശക്തിപ്പെടുത്തുന്നതിനുമാണ് പുതിയ ബസ് ലഭ്യമാക്കുന്നത്. ബസ് സർവീസ് നടത്തേണ്ട റൂട്ട് ജനപ്രതിനിധികളുമായി ആലോചിച്ച് പിന്നീട് തീരുമാനിക്കുമെന്ന് എംഎൽഎ അറിയിച്ചു.
തിരുവനന്തപുരം നിയോജകമണ്ഡലത്തിലെ എംഎൽഎ കൂടിയായ ഗതാഗത വകുപ്പ് മന്ത്രി ശ്രീ.സി.പി.ജോൺ ഉൾപ്പെടെയുള്ള നിരവധി എംഎൽഎമാർ കെഎസ്ആർടിസിക്ക് ബസ് വാങ്ങി നൽകുന്നതിനായി സന്നദ്ധത അറിയിച്ചിട്ടുണ്ട്.
ജനങ്ങളുടെ യാത്രാസൗകര്യം മെച്ചപ്പെടുത്തുന്നതിനും കൂടുതൽ പ്രദേശങ്ങളിലേക്ക് കെ.എസ്.ആർ.ടി.സി. സേവനം വ്യാപിപ്പിക്കുന്നതിനുമുള്ള ഇത്തരം ജനകീയ ഇടപെടലുകൾ പൊതുഗതാഗത രംഗത്തിന് കൂടുതൽ കരുത്തേകും.
🚌 ജനങ്ങൾക്കൊപ്പം… ജനങ്ങൾക്കായി…
കൂടുതൽ ശക്തമായ പൊതുഗതാഗതത്തിനായി കെ.എസ്.ആർ.ടി.സി.
#ജനങ്ങൾക്കൊപ്പം #പൊതുഗതാഗതം
