17/05/2024
ກອງປະຊຸມໃຫຍ່ຄັ້ງທີ່ IV ຂອງໜ່ວຍສະຫະພັນແມ່ຍິງ ລັດວິສາຫະກິດ ລາວ ສາກົນ ໂລຈິດສຕິກ ໄດ້ໄຂຂື້ນຢ່າງເປັນທາງການ ໃນຕອນເຊົ້າຂອງວັນທີ 15 ພຶດສະພາ 2024, ໂດຍການເປັນປະທານຮ່ວມ ຂອງ ສະຫາຍ ນາງ ດາວອນ ທອງຈັນ, ຄະນະບໍລິຫານງານພັກກະຊວງການເງິນ, ກຳມະການສູກກາງສະຫະພັນແມ່ຍິງລາວ, ປະທານສະຫະພັນແມ່ຍິງກະຊວງການເງິນ ແລະ ທ່ານ ພູດົງ ສຸຂະວົງ ເລຂາໜ່ວຍພັກ, ຜູ້ອຳນວຍການໃຫຍ່ ລລສລ ; ມີຜູ້ແທນເຂົ້າຮ່ວມກອງປະຊຸມໃຫຍ່ຄັ້ງນີ້ ຈໍານວນ 24 ສະຫາຍ ທີ່ມີສິດໃນການລົງຄະແນນສຽງເລື້ອກຕັ້ງ.
ໃນວາລະກອງປະຊຸມໃຫຍ່ ສະຫາຍ ນາງ ດາລຸນນີ ວໍລະສານ ຫົວໜ້າໜ່ວຍ ສພຍ ລລສລ ໄດ້ຂື້ນຜ່ານບົດລາຍງານການເມືອງ 02 ພາກ ( ແຕ່ປີ 2020-2024 ) ເຊິ່ງໄດ້ຕີລາຄາການເຄື່ອນໄຫວວຽກງານຮອບດ້ານ ຂອງໜ່ວຍສະຫະພັນແມ່ຍິງ ໃນ 01 ສະໄໝຜ່ານມາ ຊຶ່ງເຫັນໄດ້ຜົນງານ ການປະກອບສ່ວນຢ່າງຕັ້ງໜ້າ ຫຼາຍດ້ານ ຂອງເອື້ອຍນ້ອງ ສພຍ ລລສລ ເຂົ້າໃນພາລະກິດ ປົກປັກຮັກສາ ແລະ ສ້າງສາປະເທດຊາດ ເວົ້າລວມ ເວົ້າສະເພາະແມ່ນ ປະກອບສ່ວນເຂົ້າໃນວຽກງານການດຳເນີນທຸລະກິດ ຂອງ ລລສລ; ພ້ອມນັ້ນ ກໍ່ສ່ອງແສງໃຫ້ເຫັນ ບາງຈຸດອ່ອນ ແລະ ຂໍ້ຄົງຄ້າງ ທີ່ເອື້ອຍນ້ອງແມ່ຍິງ ຈະຕ້ອງໄດ້ສືບຕໍ່ປັບປຸງ ແກ້ໄຂໃນຕໍ່ໜ້າ; ພ້ອມກັນີ້ກໍ່ໄດ້ຜ່ານແຜນການເຄື່ອນໄຫວ ຂອງໜ່ວຍ ສພຍ ລລສລ ໄລຍະ 05 ປີຕໍ່ໜ້າ ( ແຕ່ເປີ 2025-2029 ), ກອງປະຊຸມໃຫຍ່ ຍັງໄດ້ຮັບຟັງບົດສໍາຫຼວດການນໍາພາລວມ ຂອງຄະນະໜ່ວຍ ສພຍ 01 ສະໄໝ ຊຶ່ງສະເໜີໂດຍ ສະຫາຍ ນາງ ຄອນສະຫວັນ ຄັດຕະພອນ ຮອງຫົວໜ້າໜ່ວຍ ສພຍ ແມ່ຍິງ.
ບັນດາຜູ້ແທນ ກອງປະຊຸມໃຫຍ່ ໄດ້ເປັນເອກະສັນ ຮັບຮອງເອົາບົດລາຍງານການເມືອງ 2 ພາກ ( ແຕ່ປີ 2020-2024 ) ແລະ ຮັບຮອງເອົາ ແຜນການເຄື່ອນໄຫວ ຂອງໜ່ວຍ ສພຍ ລລສລ ໄລຍະ 05 ປີຕໍ່ໜ້າ ( 2025-2029 ).
ຜູ້ແທນກອງປະຊຸມໃຫຍ່ໄດ້ປ່ອນບັດຄັດເລື້ອກເອົາຄະນະໜ່ວຍ ສະຫະພັນແມ່ຍິງ ລລສລ ຊຸດໃໝ່ ເພື່ອປ່ຽນແທນຄະນະໜ່ວຍ ສພຍ ຊຸດເກົ່າ ທີ່ຄົບວາລະການປະຕິບັດໜ້າທີ່ ຊຶ່ງປະກອບມີ 03 ສະຫາຍ ຄື:
1) ສະຫາຍ ນາງ ດາລຸນນີ ວໍລະສານ ເປັນຫົວໜ້າໜ່ວຍ ສພຍ;
2) ສະຫາຍ ນາງ ຄອນສະຫວັນ ຄັດຕະພອນ ເປັນຮອງຫົວໜ້າໜ່ວຍ, ປະທານກວດກາ ສພຍ;
3) ສະຫາຍ ນາງ ຕຸນີ່ ແສງຄຳຢອງ ເປັນກຳມະການໜ່ວຍ ສພຍ.
ກອງປະຊຸມ ໄດ້ຮັບຟັງ ການໂອ້ລົມຂອງ ສະຫຍ ນາງ ດາວອນ ທອງຈັນ ຄະນະບໍລິຫານພັກກະຊວງການເງິນ, ກຳມະການສູນກາງສະຫະພັນແມ່ຍິງລາວ, ປະທານສະຫະພັນ ແມ່ຍິງກະຊວງການເງິນ ຊຶ່ງທ່ານໄດ້ເນັ້ນ ໃຫ້ເອື້ອຍນ້ອງແມ່ຍິງຕ້ອງເອົາໃຈໃສ່ສຶກສາອົບຮົມວຽກງານການເມືອງ ແນວຄິດໃຫ້ເລິກເຊິ່ງ ແລະ ໜັກແໜ້ນເສີມຂະຫຍາຍຄຸນທາດການເມືອງ, ຄຸນສົມບັດສິນທຳປະຕິບັດ, ກຳແໜ້ນແນວທາງນະໂຍບາຍຂອງພັກ, ເພື່ອຍົກສູງບົດບາດຂອງແມ່ຍິງ, ເອົາໃຈໃສ່ປະຕິບັດລະບຽບ-ກົດໝາຍ ແລະ 10 ຂໍ້ຫ້າມ ຂອງພະນັກງານລັດຖະກອນ ຂະແໜງການເງິນຢ່າງເຄັ່ງຄັດ, ມີຈັນຍາບັນໃນການເຮັດວຽກຢ່າງໜັກແໜ້ນມີຄວາມຮັບຜິດຊອບ ແລະ ມີສະຕິ, ເອົາໃຈໃສ່ເສີມຂະຫຍາຍຄວາມສາມະຄີພາຍໃນ ແລະ ພາຍນອກ, ສ້າງນ່ວຍສະຫະພັນແມ່ຍິງໃຫ້ເປັນໜ່ວຍທີ່ເຂັມແຂງ, ເອົາໃຈໃສ່ແກ້ໄຂດ້ານອ່ອນ ແລະ ຂໍ້ຄົງຄ້າງໃຫ້ຕົກໄປເທື່ອລະກ້າວ ແລະ ປະຕິບັດຄຳຂວັນ, ຂໍ້ແຂ່ງຂັນ 03 ດີ ຂອງສະຫະພັນແມ່ຍິງລາວ ແລະ ຂໍ້ແຂ່ງຂັ້ນຮັກຊາດ ແລະ ພັດທະນາ ໃຫ້ສຳເລັດ, ເອົາໃຈໃສ່ເຄົາລົບນັບຖືຂະນົບທຳນຽມ ຮີດຄອງປະເພນີອັນດີງາມ ຂອງ ເອື້ອຍນ້ອງແມ່ຍິງກໍຄືຂອງຊາດລາວ.
ກອງປະຊຸມ ໄດ້ດຳເນີນເປັນເວລາເຄິ່ງວັນ ແລະ ຈົບລົງດ້ວຍຜົນສຳເລັດຢ່າງສະຫງ່າງາມ!
