02/01/2024
⭕ සතර පොහොයට සිල් ගන්නා වූ පින්වතුන් ගැන දිව්ය ලෝකයේ කථා බහ........
දෙවෙනි දිව්ය ලෝකය වූ තව්තිසා දිව්ය ලෝකයේ ඇති ,දියමන්ති පොළවකින් හා රන් රිදී මුතු මැණික් ආදියෙන් නිම වූ ,දිග පළලින් යොදුන් තුන්සියයක් වූ, වටේට යොදුන් නවසියයක් වූ සුධම්මා සභාවෙහි විශේෂ කාරණාවක් සදහා දෙවිවරුන් එක රැස් වේ.
මේ අතර පළමු දිව්ය ලෝකය වන චාතුර්මහා රාජිකයේ සතරවරම් දෙවිවරු වන ,
▪️ධතරට්ඨ නම් ගාන්ධර්ව රජු ඔහුගේ සේනාව "කෝටි ලක්ෂයක් ගාන්ධර්ව දේවතාවන්" පිරිවරාගෙන, කෝටි ලක්ෂයක් රත්රන් පලකද රන් කඩු වලින් සන්නද්ධ්ව, නැගෙනහිර දිසාවෙහි, බටහිර බලා දෙදෙව්ලොව දෙවියන්ට පසු පසින් රැකවල් දාගෙන සිටි.
▪️විරූළහක නම් කුම්භණ්ඩ රජ, ඔහුගේ සේනාව "කෝටි ලක්ෂයක් කුම්භණ්ඩ දෙවියන්" පිරිවරාගෙන, කෝටි ලක්ෂයක් මැණික් පලක සහ රන් කඩු වලින් සන්නද්ධ්ව, දකුණු දිසාවෙහි, උතුරු දෙස බලා දෙදෙව්ලොව දෙවියන්ට පසු පසින් රැකවල් දාගෙන සිටි.
▪️විරූපක්ඛ නම් නාගයින්ගේ නාරජ, ඔහුගේ සේනාව "කෝටි ලක්ෂයක් නාගයින්" පිරිවරාගෙන, කෝටි ලක්ෂයක් මැණික් පලක රන් කඩු වලින් සන්නද්ධ්ව බටහිර දිසාවේ, නැගෙනහිර බලා දෙදෙව්ලොව දෙවියන්ට පසු පසින් රැකවල් දාගෙන සිටි.
▪️වෙසමුණි නම් යක් රජු, ඔහුගේ සේනාව "කෝටි ලක්ෂයක් යකුන්" පිරිවරාගෙන කෝටි ලක්ෂයක් පබළු පලක ද රන් කඩු වලින් සන්නද්ධ්ව උතුරු දිසාවෙහි දකුණ බලා, දෙදෙව්ලොව දෙවියන්ට පසු පසින් රැකවල් දාගෙන සිටි.
▪️තව්තිසා දිව්ය ලෝකයේ පරසතු රුක මල්පිපුණු විට පනස් යොදුනක් "පැහැය" විහිදුවන්නේය. සියක් යොදුනක් "සුවඳ" විහිදෙන්නේය. පරසතු මල් පිපුණු විට ගසට නැගීමක් හෝ කෙක්කක් ගෙන අතු පාත් කිරීමක් හෝ මල් නෙලා හෝ මල් එකතු කර පැසකට දැමීමක් හෝ නැත.
▪️මල් නෙලන සුළගක් පැමිණ මල් නැට්ටෙන් සිඳියි. පිළිගන්න සුළගින් පිළිගනී. ප්රවේශ කරන සුළගින් සුධර්මා දේවසභාවට ප්රවේශ කරයි. අමදින සුළගින් පරමල් අස්කරයි. අතුරන සුළගින් කර්ණිකා, කේසර, කොල ඉවත්කර අතුරයි.
▪️දේව සභාව මැද ධර්මාසනය වෙයි. යොදුනක් පමණ මැණික් ආසනයේ ඉහළ, යොදුන් තුනක් පමණ විශාල සේසතක් ඇත.
▪️ඉන් අනතුරුව සක්දෙව් රජුට ආසනය අතුරනු ලැබේ. ඉන්පසු දේවපුත්රයින් තිස්තුන් දෙනා, අනතුරුව මහේසාක්ය දෙවියන් ,අනිත් දෙවියන්ට මල්කර්ණිකාම ආසන වේ.
▪️දෙවියෝ දේව සභාවට පිවිස හිඳගනිති. ඉක්බිති මල්රේණු වැටි, උඩට නැගී ඉහළ මල්කෙමිවල වැදී වැටෙන්නේය.එවිට දේවතාවන්ගේ තුන්ගවු පමණ ශරීර ලක්ෂා වලින් පාට කළා මෙන් සේ වෙයි.
▪️සෑම මාසයේ අටවන දිනවල දෙව්ලොව මහා ධර්ම දේශනාවක් පැවැත් වෙයි. එය පැවැත්වෙන්නේ සුධර්මා දේව සභාවේදීය. පවත්වන්නේ "සනංකුමාර මහා බ්රහ්මයා" හෝ "සක්දෙවිඳුන්" හෝ "ධර්මකථික භික්ෂුවක්" හෝ "ධර්ම කථික අන්ය දිව්ය පුත්රයෙක්" හෝ විසිනි.
💥පක්ෂයේ අටවක්(8) දිනවල සිව්වරම් රජුන්ගේ අමාත්යවරු ද, තුදුස්වක්(14) දිනවල වරම් දෙවිවරුන්ගේ පුත්රයෝ ද, පසළොස්වක(15) දිනවල සතරවරම් දෙවිවරුද, නික්මී රන් පතක් හා රත්සිරියල් ගෙන ගම් නියම්ගම් රාජධානිවල සැරිසරති.
අසවල් ස්ත්රිය හෝ පුරුෂයා හෝ......
⚡බුදුන් සරණ ගියේය.
⚡දහම් සරණ ගියේය.
⚡සඟුන් සරණ ගියේය.
⚡පන්සිල් රකීන්නේය.
⚡මාසයේ පෙහෙවෙස් රකී.
⚡මව්පිය උපස්ථාන කරයි,
⚡අසවල් තැන නෙළුම් මල් සියයක මල් කලයක් පූජා කළා.
⚡පහන් දහසක් දැල්වූවා.
⚡අකල් දහම් දෙසුම් පැවැත්වූවා.
⚡ඡත්ර වේදිකා, මුදුගරාදිවැට, ගර්භ වේදිකා, සීහාසන, සීහ සෝපාන කරවන ලදී.
⚡ත්රිවිධ සුචරිත ක්රියා පුරන ලදී.
⚡දසකුසල දහම්වල යෙදිණි.
▪️මේලෙස රත්සිරියල් තුඩෙන් රන්පතෙහි ලියාගෙන ගොස් පංචසිඛට දෙති. පංචසිඛ මාතලීට දෙයි. මාතලී ඒවා එකතුකර සක්දෙව් රජුට දෙයි.
▪️පින් කරන්නෝ අඩු නම් පොත් කුඩා වෙයි. කුඩා පොත දකින දෙවියන්, "දැන් දැන් මහාජනයා ප්රමාදයෙන්, වාසය කරයි.අහෝ ඔවුන් මිය ගොස් අපාය පිරෙයි. සදෙව් ලෝ හිස් වේ ය" යි නොසතුටු වෙති.
▪️පොත ලොකු වන්නේ නම්, ඒ දෙවියන් එය දැක, "දැන් දැන් මහජනයා අප්රමාදයෙන් වාසය කරයි. සතර අපාය හිස් වේ. සදෙව්ලෝ පිරෙන්නේය. ඔවුන් බුද සසුනෙහි පින් කොට මෙහි පැමිණි කල්හි, මහ පින්වතුන් පෙරටුකොට නැකැත් කෙළි ලබමු" යයි සතුටු වෙති.
▪️ඒ පොත් රැගෙන සක්දෙව් රජ නම් කියවයි. ඔහුගේ ස්වාභාවික ශබ්දයෙන් කියවන කල්හි "දොළොස් යොදුනක් ඇසේ". උස් හඬින් කියවන කල්හි "දස යොදුන් දහසක්" සියළු දෙව් නගරය වසා පැතිරේ.
මෙසේ සියළු දෙවිවරු ධර්ම ශ්රවණය සඳහා රැස්වෙති.
📚 මහා ගෝවින්ද සූත්ර වර්ණනාව..........
(අපිත් එම රත්රන් පත්ර වූ පොත විශාල කරවමින්........ අපගේ නම් සක්දෙව් රජ කියවන විට....., "ඒ දෙදෙව් ලොව" නගර සිසාරා කම්පා කරවමු.......පිලිවෙතින් පෙළගැසෙමු....🙏 ) කුසලයෙහි සිත ඇලීම හා වීර්ය වැඩීම සදහාම වේවා.
