18/09/2026
TRAHEDYA SA PAARALAN: 3 Patay, 8 Sugatan sa Pamamaril sa Banga National High School
BANGA, South Cotabato — Setyembre 18, 2026
Nagdulot ng matinding takot at pagdadalamhati sa komunidad ng Banga ang isang insidente ng pamamaril na naganap sa loob ng Banga National High School nitong Biyernes ng hapon.
Ayon sa mga paunang ulat, naganap ang insidente bandang alas-1:00 hanggang alas-1:30 ng hapon sa loob ng paaralan sa Barangay Benitez. Agad na sinuspinde ang mga klase sa lahat ng antas sa buong bayan habang nagsagawa ng agarang responde ang mga awtoridad.
Batay sa impormasyong ibinahagi ng pulisya at lokal na pamahalaan, isang .45 caliber pistol ang umano’y ginamit sa insidente. Sinabi rin ni Mayor Albert Palencia na ang pinaghihinalaang suspek ay isang 16-anyos na Grade 9 student na kalaunan ay nasawi rin matapos umanong barilin ang sarili.
Sa pinakahuling ulat ng DSWD alas-5:00 ng hapon, tatlong estudyante ang kumpirmadong nasawi habang walong iba pa ang malubhang nasugatan. Patuloy pa ring inaalam ng mga awtoridad ang buong detalye ng pangyayari habang nagpapatuloy ang imbestigasyon.
Nagpadala na ang DSWD ng mga social worker upang magbigay ng psychological first aid sa mga naapektuhang estudyante, pamilya, at kawani ng paaralan. Samantala, nakikipag-ugnayan ang Department of Education sa pulisya at lokal na pamahalaan upang matiyak ang kaligtasan ng mga mag-aaral at maibigay ang kinakailangang suporta sa mga biktima.
Nanawagan naman ang DepEd Region XII sa publiko na iwasan ang pagpapakalat ng mga video at larawan ng insidente upang hindi na madagdagan pa ang trauma ng mga biktima at kanilang mga pamilya.
Habang nagpapatuloy ang imbestigasyon, hinihikayat ang publiko na maghintay lamang ng opisyal na impormasyon mula sa PNP, DSWD, at LGU ng Banga.
Photo Caption: Mga eksenang kuha matapos ang insidente ng pamamaril sa Banga National High School noong Setyembre 18, 2026, na nagresulta sa pagkamatay ng tatlong estudyante at pagkasugat ng ilan pa, ayon sa mga paunang ulat.
