11/10/2026
ဒီမြောက်ပိုင်းစာအုပ်ကိုဖတ်နေရင်းနဲ့ ပထမဆုံး ခံစားရမှာကတော့ တစ်ချိန်က ကချင်၊ ရှမ်း၊ မြန်မာ တိုင်းရင်းသားတွေရဲ့ စည်းလုံးညီညွတ်မှု၊ သူ့ကျွန်မခံဘဲရွံ့ရွံ့ချွန်ချွန် တိုက်ခိုက်ကြတဲ့
လက်ရုံးရည်၊နှလုံးရည် နဲ့ အေးချမ်းလှပပြီး ရင်သပ်ရှုမောဖွယ်မြန်မာပြည်မြောက်ပိုင်းရဲ့အလှတွေကို ကိုယ်တိုင်
ရောက်ရှိသွားသလိုခံစားရမှာဖြစ်ပါတယ်။
တိုင်းရင်းသားတို့ရဲ့ နေထိုင်စားသောက်မှုနဲ့ ချစ်စရာဓလေ့၊ တောင်ပေါ်မြေပြန့်မတူကြတဲ့ ဝတ်စားဆင်ယင်မှုရိုးရာများကိုလဲစာရေးဆရာရဲ့ ပြောင်မြောက်သောအရေးသားတွေကြောင့် ကိုယ်တွေ့ခံစားနေရသလို ရုပ်လုံးကြွပြီး စိတ်ဝင်စားဖွယ်ဖတ်ရှုရမှာဖြစ်ပါတယ်။
"သေရင်တောင် ကျွန်လိုမသေဘဲ သခင်လို"သေမယ် နောက်ဆုံးထွက်သက်ထိစစ်တိုက်ရင်းပဲသေသွားမယ်" ဆိုတဲ့ ရှမ်းတိုင်းရင်းသားအဖိုးကြီး ဘကြီးမုံးရဲ့ ပြင်း
ပြတဲ့ မျိုးချစ်စိတ်ဓာတ်၊ စစ်ရေးပရိယာယ်ကြွယ်ဝပုံကိုလဲခံစားရမှာဖြစ်ပြီး၊ ဘယ်လောက်ပဲ ဆင်းရဲဒုက္ခရောက်ရောက် လက်မလျှော့တက်တဲ့ဇွဲနဲ့ စစ်မှန်တဲ့တိုင်းရင်းသားတွေရဲ့ နှလုံးသား တွေကိုလဲ စာရေးသူရဲ့ပြောင်မြောက်တဲ့ရေးသားမှုတွေကြောင့် လေးစားအတုယူဖွယ် ရင်သပ်ရှုမောသိမြင်ခံစားပြီး ဖတ်ရှုရမယ့်ဂန္တဝင်စာအုပ်ကြီးလဲဖြစ်ပါတယ်။
အဲ့ဒီခေတ်ကပြည်သူပြည်သားတွေရဲ့ဆင်းရဲဒုက္ခရောက်မှုတွေ၊ နောက် အမျိုးသမီးတွေဟာလဲ ဇနီးတစ်ယောက်သာမကဘဲ လိုအပ်ရင်
ရဲရင့်စွာ တိုက်ပွဲဝင်ကြတဲ့ တပ်သားတွေအနေနဲ့ တစ်မျိုး ၊ တောင်ယာလုပ်ငန်းလုပ်ကိုင်ပြီးရိုးသားစွာ ရှာဖွေစားသောက်ကြသော အရပ်သားတွေနဲ့တစ်ဖုံ၊ အမျိုးမျိုးတွေ့ရှိကြမှာဖြစ်ပါတယ်။ ဘာမှအလုပ်မလုပ်တဲ့ ဘိန်းစားအသုံးမကြတဲ့တောင်ပေါ်သားငလူးတွေရဲ့အကျင့်စရိုက်တွေကိုလဲ ဖတ်ရှုခံစားရမှာဖြစ်ပါတယ်။
တစ်ခါ အဖိုးရဲ့ခြေရာကိုနင်းပြီးဘုရင့်တပ်ထဲဝင်ဖို့ သွားတဲ့ လူငယ်လေးမောင်ရွှေဝါနဲ့တစ်ချိန်က အဖိုးရဲ့သူငယ်ချင်းဖြစ်သူ ဘကြီးမုံးနဲ့ဆုံတွေ့ပြီး တောင်ပေါ်ကိုရောက်ရှိသွားတဲ့ လူငယ်လေး မောင်ရွှေဝါ တောင်ပေါ်က လူကြီးသမီးဖြစ်သူ ကနန်းတိုင်းရင်းသူလေး မနှင်းမြူ တို့ တွေ့ဆုံပြီး မေတ္တာမျှကြပုံ၊တစ်ဖက်ကအချစ် ၊ တစ်ဖက်က နိုင်ငံရေးဖြစ်လာတဲ့အခါမှာ သူတို့နှစ်ယောက်ဘယ်လိုတွေကြုံတွေ့ကြဦးမလဲဆိုတာကိုအလွမ်း၊ အဆွေးအစုံနဲ့ စီးမြောသွားစေမှာဖြစ်ပါတယ်။ နောက်ပိုင်း မောင်ရွှေဝါကရော ဘယ်လိုတွေပြောင်းလဲသွားမှာလဲ ၊ သူ့ချစ်တဲ့သူနဲ့ရောပေါင်းဖက်ရမှာလားဆိုတာတော့ ဖတ်ကြည့်နော်
တစ်ခါ ယောကျာ်းသေရင် ယောကျာ်းရဲ့ ညီအကို၊ ဒါမှမဟုတ် ယောကျာ်းအဖေနဲ့ယူရတယ်ဆိုတဲ့ ကချင် ရိုးရာဓလေ့ကို သူကိုယ်တိုင်မလိုက်နာနိုင်ကြောင်းပြသကာ ရိုးရာဓလေ့ကိုဆန်ကျင့်ပြီး တောင်ပေါ်ဒေသကနေ တစ်ယောက်တည်း ကိုယ်ဝန်အရင့်အမာကြီးနဲ့ ထွက်ပြေးတိမ်းရှောင်ရင်း ဆင်ဖမ်းလာတဲ့ ရွှေနီ၊ ရွှေဝါ ညီအကိုနဲ့တွေ့ကြပုံ၊ ကိုယ့်ကလေးကို ကိုယ်တိုင်မွေး အချင်းကိုကိုယ်တိုင်ဖြတ် ရိုးရာအတိုင်းအချင်းကိုသေချာမြေမြှပ်တဲ့ရဲရင့်တဲ့ကချင်အမျိုးသမီး၊ ကလေးမွေးပြီးတစ်ရက်မှာပဲ နေထိုင်ဖို့ ကိုယ်တိုင် သစ်ဝါးခုတ်ပြီး တဲအိမ်ကိုယ်တိုင်ဆောက်သူ၊ သားကိုမဂမ်လို့အမည်ပေး ရဲရင့်ပီးအမျိုးကိုချစ်တက်အောင်သင်ပြပြီး ရိုးရာဓလေ့ကို ဆန့်ကျင်ကာ အမျိုးသမီးတစ်ယောက်တည်းရပ်တည်နိုင်ကြောင်းပြသပေးခဲ့သူ ကချင်အမျိုးသမီးကြီး
မခေါင်ညွယ်ရဲ့ ပြတ်သားလှတဲ့စိတ်ထားနဲ့ ဂုဏ်သိက္ခာကြီးမားလှပုံကို ကချင်လူမျိုး အမျိုးသမီးတစ်ယောက်ရဲ့ရဲရင့်မှုကနေ ကချင်တွေရဲ့ လူမျိုးစုပုံရိပ်ကိုခမ်းနားစွာခံစားရမှာဖြစ်ပါတယ်။
ကချင် အပျို၊ လူပျိုတွေရဲ့စိတ်လှုပ်ရှားဖွယ်ညတွေ၊ တေးသီချင်းနဲ့ ချစ်ခွင့်ပန်ပုံတွေ၊ရှမ်းလူမျိုးတွေရဲ့ ကောက်ရိတ်သိမ်းပွဲတွေ၊ မီးပုံပွဲတွေ ကိုလဲဗဟုသတရဖွယ်လေ့လာရမှာလဲဖြစ်ပါတယ်။
ဒီလို နိုင်ငံရေး၊ လူမှုရေး၊ ကျေးလက်နဲ့ တောင်ပေါ်တိုင်းရင်းသားတို့ရဲ့နေထိုင်မှုဘဝ၊ အချင်းချင်းသစ္စာရှိရှိရိုင်းပင်းကူညီကြတဲ့စိတ်ထား တွေကို သုတ၊ ရသ အစုံပြောင်မြောက်အောင်ရေးသားဖန်တီးခဲ့တာကတော့ ဂန္တဝင်စာရေးဆရာကြီး နတ်နွယ်ပဲဖြစ်ပါတယ်။ဒီလိုစိတ်ဝင်စားစရာအကြောင်းအရာတွေပါတဲ့
"မြန်မာပြည်မြောက်ပိုင်း" ဆိုတဲ့စာအုပ်ကိုဖတ်ကြည့်ကြဖို့စာဖတ်သူမိတ်ဆွေများကိုလဲ ညွှန်းပေးချင်ပါတယ်ရှင်။
ခိုင်ကတော့ဖတ်နေရင်းနဲ့ စိတ်ဝင်စားစရာကောင်းလွန်းလို့ ဒီလောက်အထူကြီးကို လက်ကမချင်လောက်အောင်ဖြစ်မိပါတယ်။ ပြီးတော့ဖတ်နေရင်း တစ်ချိန်က မြန်မာနိုင်ငံရဲ့ နိုင်ငံရေးအခင်းအကျင်းတွေလဲမြင်တွေ့ရပြီး အသိပညာဗဟုသုတတွေအများကြီးရပါတယ်။ လွမ်းရတယ်၊ ဆွေးရတယ်၊ ကြည်နူးရတယ်၊ ဒေါသထွက်ရတယ် ဒီလိုစိတ်ခံစားချက်အစုံကို တစ်ချိန်တည်းခံစားရလို့ဖတ်ရတာ အနှစ်သာရရှိလှပါတယ်။ ရေးသားသူ စာရေးဆရာကိုလဲ ကျေးဇူးအများကြီးတင်ပါတယ်။
စာအုပ်အမည်- မြန်မာပြည်မြောက်ပိုင်း
ရေးသားသူ- နတ်နွယ်
ထုတ်ဝေသူ- စိတ်ကူးချိုချို
(တတိယကြိမ်မြောက်)
Khaing
11.10.2026
#နတ်နွယ်
#မြန်မာပြည်မြောက်ပိုင်း
#စာအုပ်အညွှန်း
