20/07/2026
🚢 ဇိမ်ခံစူပါကားပေါင်း ၄,၀၀၀ နီးပါးနှင့်အတူ သမုဒ္ဒရာရေအောက်သို့ နစ်မြုပ်သွားခဲ့သည့် Felicity Ace ကုန်တင်သင်္ဘောကြီး - ကမ္ဘာ့မော်တော်ကားလောကကို တုန်လှုပ်စေခဲ့သည့် သမိုင်းဝင် ရေကြောင်းမတော်တဆမှုကြီး
မတော်တဆမှု တစ်ခုတည်းနဲ့ဒေါ်လာသန်းပေါင်းများစွာ တန်ဖိုးရှိတဲ့ ဇိမ်ခံကားပေါင်း ထောင်နဲ့ချီပြီး သမုဒ္ဒရာရေအောက်ထဲကို နစ်မြုပ်ပျောက်ကွယ်သွားလိမ့်မယ်လို့ ဘယ်သူက စိတ်ကူးယဉ် တွေးထင်ဖူးကြပါလိမ့်မလဲ။
ဖယ်လစီတီ အေ့စ် (Felicity Ace) ကုန်တင်သင်္ဘောကြီးရဲ့ ဇာတ်လမ်းကတော့..လွန်ခဲ့တဲ့ မကြာသေးခင်နှစ်တွေအတွင်း ဖြစ်ပွားခဲ့ကြတဲ့ ရေကြောင်းဆိုင်ရာ မတော်တဆမှု ဘေးအန္တရာယ်ကြီးတွေထဲမှာ အံ့ဩစရာ အကောင်းဆုံး ဖြစ်ရပ်တစ်ခု ဖြစ်ခဲ့ပါတယ်။ လွန်ခဲ့တဲ့ ၂၀၂၂ ခုနှစ်၊ ဖေဖော်ဝါရီလတုန်းက... ဂျာမနီနိုင်ငံကနေ အမေရိကန်ပြည်ထောင်စုဆီကို သစ်စက်စက် စက် ကားအစီးရေ ထောင်ပေါင်းများစွာကို အစုလိုက်အပြုံလိုက် သယ်ယူပို့ဆောင်ပေးနေတဲ့ အဆိုပါ ကုန်တင်သင်္ဘောကြီးပေါ်မှာ မီးလောင်မှုတစ်ခု စတင်ဖြစ်ပွားခဲ့ပါတယ်။ တကယ့်ကို ကံကောင်းထောက်မစွာနဲ့ပဲ... သင်္ဘောပေါ်မှာပါတဲ့ သင်္ဘောသား ၂၂ ဦးစလုံးရဲ့အသက်တွေကိုတော့ မည်သည့်ထိခိုက်ဒဏ်ရာမျှမရဘဲ ဘေးကင်းလုံခြုံစွာ ကယ်ဆယ်နိုင်ခဲ့ပါတယ်။
အဆိုပါ မီးလောင်မှုဟာ နှစ်ပတ်နီးပါးမျှကြာအောင် ဆက်လက်တောက်လောင်နေခဲ့တာကြောင့်... ကယ်ဆယ်ရေးအဖွဲ့တွေအနေနဲ့ သင်္ဘောကြီးကို မီးငြှိမ်းသတ်ပြီး ကယ်တင်ဖို့အတွက် အလွန်တရာ ခက်ခဲခဲ့ပါတယ်။ ကယ်ဆယ်ရေးအဖွဲ့တွေက ၎င်းသင်္ဘောကြီးကို နောက်ဆုံးမှာ ဆွဲယူဖို့ စတင်ကြိုးပမ်းခဲ့ကြတဲ့ အခါမှာတော့... ပြင်းထန်လှတဲ့ မီးလောင်မှုဒဏ်ကြောင့် ပျက်စီးသွားခဲ့တာတွေအပြင် ပင်လယ်ပြင်ရဲ့ လှိုင်းလေကြမ်းတမ်းမှုတွေကြောင့် သင်္ဘောကြီးဟာ ဟန်ချက်ပျက်သွားခဲ့ရပပြီးတဲ့နောက် ၂၀၂၂ ခုနှစ်၊ မတ်လ ၁ ရက်နေ့မှာတော့... ဖယ်လစီတီ အေ့စ် သင်္ဘောကြီးဟာ အာဇိုးစ် (Azores) ကျွန်းစုနဲ့ အကွာအဝေး မိုင် ၂၅၀ ခန့်အလိုမှာ နစ်မြုပ်သွားခဲ့ပြီး.ပင်လယ်ရေမျက်နှာပြင် (sea level) ရဲ့အောက် ပေပေါင်း ၁၀,၀၀၀ ခန့်အကွာ သမုဒ္ဒရာ ကြမ်းပြင်ပေါ်မှာ လဲလျောင်းအနားယူသွားခဲ့ပါတော့တယ်။
အဆိုပါ သင်္ဘောကြီးဟာ ပေါ်ရှေး (Porsche)၊ အော်ဒီ (Audi)၊ ဘန့်လေ (Bentley)၊ လန်ဘိုဂီနီ (Lamborghini) နဲ့ ဗော့်ဇ်ဝက်ဂွန် (Volkswagen) မော်ဒယ်တွေ အပါအဝင်... ဗော့်ဇ်ဝက်ဂွန်လုပ်ငန်းစု (Volkswagen Group) က ထုတ်လုပ်တဲ့ မော်တော်ကား စုစုပေါင်း ၃,၉၆၅ စီးကို သယ်ဆောင်လာခဲ့တာ ဖြစ်ပါတယ်။
ရေကြောင်းဆိုင်ရာ ကျွမ်းကျင်သူတွေရဲ့ ခန့်မှန်းချက်အရ... သင်္ဘောပေါ်မှာပါတဲ့ ကုန်စည် (မော်တော်ကားများ) ရဲ့ တန်ဖိုးဟာ အမေရိကန်ဒေါ်လာ ၄၀၁ သန်းဝန်းကျင်အထိ ရှိနေခဲ့တာကြောင့်... သမိုင်းတစ်လျှောက် မော်တော်ကား ဆုံးရှုံးမှုတွေထဲမှာ အကုန်အကျ ပမာဏ အများဆုံး ဖြစ်ရပ်တစ်ခုအဖြစ် မှတ်တမ်းဝင်သွားခဲ့ပါတော့တယ်။
အဆိုပါ နစ်မြုပ်သွားတဲ့ ကားတွေထဲမှာ... ထုတ်လုပ်မှုလုပ်ငန်းစဉ် အားလုံးပြီးစီးသွားခဲ့ပြီဖြစ်တဲ့ လန်ဘိုဂီနီရဲ့ နောက်ဆုံးလက်ရာ မော်ဒယ်တွေဖြစ်တဲ့ "Lamborghini Aventador Ultimae" ကားတွေလည်း ပါဝင်သွားခဲ့ပါတယ်။ ဒါကြောင့် လန်ဘိုဂီနီကုမ္ပဏီအနေနဲ့ ကားဆုံးရှုံးသွားခဲ့ရတဲ့ ဝယ်ယူသူတွေအတွက် အဆိုပါကားတွေကို ပြန်လည်ထုတ်လုပ်ပေးဖို့ စက်ရုံလည်ပတ်မှုကို နောက်တစ်ကြိမ် ပြန်လည်စတင်ခဲ့ရသလို... ပေါ်ရှေးကုမ္ပဏီကလည်း ထိခိုက်ဆုံးရှုံးသွားခဲ့ရတဲ့ စိတ်ကြိုက်မှာယူထားတဲ့ ကားအော်ဒါ (Custom orders) တွေကို ပြန်လည်အစားထိုး ထုတ်လုပ်ပေးခဲ့ရပါတယ်။
ဖယ်လစီတီ အေ့စ် သင်္ဘောကြီးရဲ့ ဖြစ်ရပ်ဟာ ရေကြောင်းဆိုင်ရာ မတော်တဆမှုတစ်ခုတည်းနဲ့ ကမ္ဘာလုံးဆိုင်ရာ မော်တော်ကားထုတ်လုပ်ရေး ကဏ္ဍကြီးတစ်ခုလုံးအပေါ် ဘယ်လောက်အထိ ရေရှည်သက်ရောက်မှု ရှိသွားစေနိုင်လဲဆိုတာကို ပြသနေတဲ့ အားကောင်းလှတဲ့ သတိပေးချက်တစ်ခုအဖြစ် ယနေ့တိုင် တည်ရှိနေဆဲ ဖြစ်ပါတယ်။
Ref : Knowledge Junction
✍️
20 Jul 26
♣️*KgK
::::::::::::::
